ముఖ్యమంత్రిగా తొలిసారి ఢిల్లీకి విజయ్.. నేడు ప్రధాని మోదీతో కీలక భేటీ!

తమిళనాడు ముఖ్యమంత్రిగా బాధ్యతలు చేపట్టిన తర్వాత జోసెఫ్ సి. విజయ్ బుధవారం తొలిసారిగా దేశ రాజధాని ఢిల్లీలో అధికారికంగా పర్యటించనున్నారు. ఈ పర్యటనలో భాగంగా ఆయన ప్రధానమంత్రి నరేంద్ర మోదీతో పాటు కేంద్ర ఆర్థిక మంత్రి నిర్మలా సీతారామన్‌లను కలిసే అవకాశం ఉంది. తమిళనాడు రాష్ట్రానికి అదనపు ఆర్థిక సహాయం అందించడంతో పాటు, అక్కడ పెండింగ్‌లో ఉన్న పలు కీలక మౌలిక వసతులు, అభివృద్ధి ప్రాజెక్టులకు వేగంగా అనుమతులు మంజూరు చేయాలని కోరుతూ ఆయన కేంద్రానికి వినతిపత్రాలు సమర్పించనున్నారు. బుధవారం ఉదయమే ఢిల్లీకి చేరుకోనున్న విజయ్, ఈ భేటీల అనంతరం అదే రోజు రాత్రికి తిరిగి చెన్నై చేరుకుంటారని విశ్వసనీయ వర్గాలు వెల్లడించాయి.

తమిళనాడు ఆర్థిక పురోభివృద్ధికి అత్యంత కీలకమైన పారిశ్రామిక వృద్ధి రంగాలు, సంక్షేమ పథకాలు, కనెక్టివిటీ ప్రాజెక్టులతో పాటు మౌలిక వసతుల విస్తరణకు కేంద్రం నుంచి గట్టి మద్దతు లభించేలా ముఖ్యమంత్రి విజయ్ ఈ పర్యటనలో చొరవ తీసుకోనున్నారు. రాష్ట్రానికి రావాల్సిన ఆర్థిక కేటాయింపులను సాధించుకోవడమే లక్ష్యంగా ఈ చర్చలు సాగనున్నాయి.